容祖兒(Joey)去咗屯門，為新碟《答案之書》舉行簽名會，吸引數百位Fans到場，Joey就同佢哋玩遊戲。啱啱喺鍾欣潼（阿嬌）嘅婚宴上做姊妹嘅祖兒表示，呢幾日快樂嘅情緒一浪接一浪：「今日又聽到王祖藍囡囡出世，真係戥佢開心，一陣得閒要打電話恭喜佢。」
問Joey喺阿嬌婚宴當晚有冇飲到斷片？佢就笑住話：「咁又冇，我飲咗一杯即刻胃痛，之後全晚都冇飲，都唔知係咪假酒嚟嘅。」祖兒又指當晚每一個細節都記得好清楚：「睇住好姊妹結婚好感動，而且仲睇到公司上下一心，將所有工作擺低去幫阿嬌打點，感覺真係好似嫁女。」唔知有冇感動到喊？佢就話：「有呀，可能人大咗，少少嘢就好易變喊包，唔止我，見到老闆楊生都好開心，真係好似屋企人出嫁咁。」
講到下一個結婚嘅係咪到阿Sa(蔡卓妍)？Joey話：「我冇問呢啲嘢，佢哋有自己計劃，而且楊生已經好幫到手，成晚好開心咁係咁叫人飲酒。」 祖兒又透露日前已經同媽咪食咗冬至飯，雖然呢兩日唔使開工，但就會選擇留喺屋企休息。
|
